ÁNGELES RUIBAL - FOLKLORE ARGENTINO Y POESÍA HECHA CANCIÓN

 

NAICIÑA DO CORAZÓN

Hoxe quero decirche miña naiciña

que te amo día a día,

unha parte dos latexos soan contigo

e outra parte son tantas horiñas

que xuntas fixemos bailar.

Naiciña do corazón

sempre pensando en mín,

arando nas túas entrañas

alentos que non teñen fin.

Hoxe quero decirche miña naiciña

que es terra de valentía,

anacos do camiño que pisan contigo

e outros anacos son tantas folliñas

que enraizan có teu andar.

Naiciña do corazón

sempre coidando de mín,

tecendo noites e mañáns

as caricias que aman sen fin.

A tódalas nais e tamén para avós, avoas e pais que foron, son e serán dalgún xeito tamén nais.

Grazas no día da nai en España que se celebra sempre o primeiro domingo do mes de maio.

Ana Vila Portomeñe. Poeta Labrega

En Taboada a 7 de Maio do 2023.

AS ALDEAS DA MEMORIA

Aldeas onde nacemos

lémbranse dun pasado,

con anacos de soños

e camiños ben enfíados.

Temos hoxe connosco

a Baldo Ramos,

que nos irá contando

do que foi tan amado.

Soa cada melodía

nas fotos dun arado,

e as palabras de Baldo

váise tornando poesía.

A memoria das aldeas

sempre estará viva,

namentres fogares e leiras

teñan unha vida.

Vida como a que o escritor Baldo Ramos, a música de Manuel Panferreteiroe as fotos de Ignacio Castro "Nachok"... amosaron en Taboada, nun evento onde presentei a súa actuación sobre o libro As aldeas da memoria. Editado pola Deputación de Lugo, e que grazas a ela, ao concello de Taboada e a Asociación Mulleres Rurais Landra de Taboada, tivo lugar o sábado 28 de Abril do 2023. 

Poesía para dito acto.

Ana Vila Portomeñe. Poeta Labrega.

UN LIBRO

 

Un libro é un amigo

no viaxar do camiño,

con ensinanzas e risas

que nunca serán olvido.

Nun libro atoparás frío

fogueiras e algún ruído,

con tristezas e caricias

que falarán no oido.

Un libro é un amigo

no estar do destino,

con palabras escritas

que non perden o latido.

Nun libro es ti, sentindo

e sentindo es ti, nun libro.

Ana Vila Portomeñe. Poeta Labrega.

En Taboada a 23 de Abril do 2023.

Día do libro.

QUEDOU EN TI

Quedóuseme a pel
no alento das túas mans,
e coa doce ollada
creache un mundo de latexos.

Quedou en ti,

o camiño que é sorriso

a pesares desas agullas

que choran nos reloxos.

Quedóuseme a sen

nesas letras e falas irmáns,

e con verdade calada

forxache un fogar nos meus dedos.

Quedou en ti,

a honra de cada respiro

dando os meus pés as axudas

que renacen dos enoxos.

Quedóuseme o meu ser

no libro sen papel,

ese que de  ti

florea na rama do vivir,

un vivir que se chama querer

e se pronuncia nacer.

Quedou en ti

todo de min.

Ana Vila Portomeñe. Poeta Labrega

En Taboada a 16 de Abril do 2023

EU CRÉOTE

 

Cando me din os teus ollos

sigue camiñando,

eu créote, en tí confio

a túa man vaime agarrando.

Cando sinto que non poido máis

sigo loitando,

eu créote, en ti confio

o teu alento chégame calado.

Cando no mundo se perde a fe

sigo rezando,

eu créote, en ti confio

a túa palabra está falando.

Créote, en ti confio,

os dias van pasando

e na miña vida 

o teu corazón sigue sangrando.

Créote, en ti confio

cando todo semella perdido,

créote, en ti confio

tamén a morte deixa algo vivo.

Cando me din os teus ollos

que siga amando,

que non perda a fe,

créote...e sigo confiando.

Ana Vila Portomeñe.Poeta Labrega.

En Taboada a 9 de Abril do 2023.

Domingo de Pascoa.

A VACA - POEMA E DEBUXOS ALUSIVOS